Nakakolekta og 23,623 ka mga butang nga may kalabotan sa sikat nga karakter nga si Winnie the Pooh ang usa ka babaye sa Estados Unidos nga ginganlag Deb Hoffmann.
Base sa Guinness World Records, opisyal nga natala ang maong koleksiyon ni Hoffmann niadtong Pebrero 2023, diin naglangkob kini sa nagkalainlaing mga butang nga adunay hulagway ni Winnie the Pooh ug sa iyang mga higala nga sila Eeyore, Tigger ug Piglet.
Sukad sa pagkabata, nahigugma na si Hoffmann sa maong karakter human siya hatagi sa iyang amahan og stuffed toy ni Winnie the Pooh sa edad nga duha ka tuig.
Niadtong 2008, unang napamatud-an ang iyang rekord nga adunay 4,405 ka mga koleksiyon, apan misaka kini pag-ayo sulod sa mga katuigan.
Matod ni Hoffmann, wala niya damha nga moabot sa kapin 23,000 ka mga butang ang iyang koleksiyon, nga nagsugod lamang sa iyang gugma sa mga novelty telephone ug sa usa ka telepono nga adunay hulagway ni Winnie the Pooh.
