SARANGANI-Nanawagan og dugang suporta ang DepEd Sarangani alang sa “Project Tahanan Adopt a Teacher” aron matabangan ang mga magtutudlo nga naapektuhan sa kalamidad pinaagi sa pagtukod og temporaryong kapuy-anan.
Matud ni Dona Panes, Chief sa Curriculum Implementation Division sa DepEd Sarangani, dako kaayong tabang ang donasyong P20,000 matag panimalay tungod kay makatabang kini sa pagtukod og usa ka temporary shelter alang sa mga maestra ug maestro.
Giingon niya nga ang mga magtutudlo adunay dakong papel sa paghulma sa kahibalo ug personalidad sa mga estudyante, mao nga angay usab silang tabangan sa panahon sa kalisdanan.
Gipaambit usab ni Panes ang makapatandog nga istorya sa usa ka magtutudlo nga bag-o lang napromote gikan sa Teacher 1 ngadto sa Teacher 3 ug boluntaryong midonar sa iyang P20,000 nga incentives aron “mo-adopt” og usa ka kaubang magtutudlo nga nanginahanglan og tabang.
Sa pagkakaron, miabot na sa kapin P600,000 ang natigom nga donasyon alang sa proyekto, apan giingon ni Panes nga kulang pa gihapon kini aron matubag ang panginahanglan sa tanang apektadong magtutudlo, hinungdan nga nagpadayon sila sa paghangyo og suporta gikan sa publiko.
