Gisugdan ang site visit ug assessment sa lugar nga naigo sa landslide sa pangunang dalan sa Barangay Kapatan, Glan, Sarangani Province, human sa epekto sa Magnitude 7.8 nga linog.
Sumala sa mga otoridad, dakong kadaot ang nahatag sa maong karsada tungod sa pagdahili sa yuta, hinungdan nga naapektuhan ang pagbiyahe ug paghatod sa mga kinahanglanong serbisyo ngadto sa mga residente sa lugar.
Padayon karon ang clearing operations nga gipahigayon sa Department of Public Works and Highways o DPWH Sarangani aron dali nga malimpyohan ang natabunang bahin sa dalan ug maablihan pag-usab kini alang sa mga sakyanan ug mga responder.
Gilauman nga pinaagi sa paspas nga clearing operations, mas mapadali usab ang pagpasulod sa mga relief goods ug uban pang ayuda alang sa mga pamilyang naapektuhan sa kusog nga linog sa munisipyo sa Glan.
Giingong prayoridad sa gobyerno ang dali nga pagsulbad sa maong sitwasyon aron masiguro ang kaluwasan sa publiko ug mabalik sa normal ang transportasyon ug paghatag sa mga nag-unang serbisyo sa maong lugar. Ang mga ahensya sa gobyerno nagpabiling alerto ug nagpadayon sa monitoring sa mga lugar nga posible pang maapektuhan sa mga pagdahili sa yuta human sa linog.
