Gikatakdang motestigo ang kanhing Overseas Filipino Worker nga si Mary Jane Veloso sa Hunyo 19 sa Correctional Institution for Women sa Mandaluyong City.
Kini ipahigayon sa Mandaluyong City Regional Trial Court Branch 210 diin ang testimonya ni Veloso madungog sulod sa CIW diin siya gibilanggo.
Si Veloso gibalhin ngadto sa CIW gikan sa Indonesia niadtong 2024 human makonbikto sa pagpamaligya og droga.
Si Veloso motestigo batok sa iyang ilegal nga recruiter nga si Maria Cristina Sergi ug uban pa sa kasong qualified trafficking in person, estafa ug paglapas sa Migrants Workers and Overseas Filipino Act.
Ang kaso gidungog sa Santo Domingo, Nueva Ecija Regional Trial Court ug tungod kay si Veloso gibilanggo sa CIW, ang Korte Suprema nakahukom nga ipahigayon ang hearing sulod sa compound sa prisohan.
Gimandoan usab sa korte ang ICW nga mag-andam og kwarto diin ipahigayon ang hearing, uban sa pipila ka mga personahe sa Mandaluyong Regional Trial Court ug pipila ka mga partido.
