Gidala sa ospital ang kanhi Public Works Secretary nga si Manuel Bonoan human misaka ang iyang blood pressure kasunod sa pagpagawas sa Sandiganbayan og arrest warrant batok kaniya.
Gikumpirma kini ni Department of Interior and Local Government (DILG) Secretary Jonvic Remulla human sa boluntaryong pagsurender ni Senator Jinggoy Estrada.
Kauban ang kanhing kalihim nga nag-atubang sa kasong plunder may kalabotan sa giingong anomalya sa flood control projects.
Matud pa ni Remulla nga hugot ang pagbantay sa PNP General Hospital diin ang mga doktor maoy magdesisyon kon mahimo na bang makagawas si Bonoan aron moatubang sa iyang kaso.
Hinumduman nga niaging semana nakapiyansa sila Bonoan ug Estrada sa Sandiganbayan tungod sa kasong graft, samtang ang Fifth Division sa Sandiganbayan nagpagawas og warrant of arrest niadtong Lunes.
