Naglisod sa pagsabot sa ilang gibasa ang kapin sa usa ka milyon nga mga estudyante sa Grade 11 sa tibuok nasod, sumala sa labing bag-ong report sa Second Congressional Commission on Education (EDCOM 2).
Kini human nagpahigayon ang Department of Education (DepEd) og usa ka Senior High School literacy assessment niadtong Marso 2026, diin nakit-an nga 1.3 milyon sa 1.4 milyon nga mga estudyante sa Grade 11 ang adunay problema sa pagsabot sa pagbasa.
Sumala ni Simoun Antonio Salinas sa EDCOM 2, 12 porsyento (12%) lang sa mga estudyante sa Grade 11 ang maisip nga “independent learners” o kadtong hingpit nga makasabot sa ilang gibasa nga walay tabang sa uban.
Sa maong ihap, halos unom sa matag napulo ka mga estudyante ang natala sa “frustration level”—ang labing ubos nga lebel sa literacy diin halos wala silay masabtan sa ilang gibasa. Samtang, halos tulo sa matag napulo ka mga estudyante ang anaa sa “instructional level” nga nanginahanglan pa gihapon og giya gikan sa magtutudlo aron masabtan ang teksto.
Gibasol sa ACT Teachers Party-list ang maong kapakyasan ngadto sa sistematikong problema sa edukasyon sa nasod, ilabi na ang palisiya sa “mass promotion” sa mga tunghaan. Gidugangan sa maong grupo nga daw adunay pressure sa nagkalain-laing lebel sa sistema nga mopasar sa mga estudyante bisan pa man kung dili pa kini andam.
Giduso sa EDCOM 2 nga dili lang ang Grade 11 ang apektado sa maong krisis tungod kay gibantog nga 40% sa mga estudyante sa tanang lebel sa grado ang naglisod gihapon sa pagsabot sa pagbasa.
Taliwala niini, gipahayag ni Education Secretary Sonny Angara nga mag-focus karon ang DepEd sa pagpalig-on sa pagbansay sa mga magtutudlo aron mas mapalambo pa ang kritikal nga pagsabot sa mga estudyante ug dili lang ang pamaagi sa pagmemorya.
