Daghang mga pulis usab ang gusto nga mosugilon mahitungod sa ilang mga kasinatian sa madugoong drug war kaniadtong administrasyon ni kanhi Pangulong Rodrigo Duterte, sumala sa bag-ong natukod nga EJK Truth Commission.
Pahayag ni EJK Truth Commission Executive Director Carlos Conde, sa wala pa pa matukod ang independent body, adunay na daan mga pulis nga nagpahayag sa ilang tinguha nga makasulti ug makapaambit sa ilang lisod ug makalilisang nga kasinatian.
Matud pa niya, dili malikayan kaniadto nga mosunod lang ang mga pulis sa mga mando gikan sa national headquarters bisan pa nga supak kini sa ilang kabubut-on.
Wala usab silay higayon kaniadto nga mosulti o moreklamo batok sa sistema ug organisasyon nga ilang gipanarbahoan tungod sa istriktong pagsunod sa “chain of command.”
Sumala ni Conde, gusto sa Truth Commission nga mahimong lugar kini aron makagawas ang mga pulis sa ilang mga kasinatian ug trauma gikan sa mga operasyon, ug ang epekto niini sa ilang kinabuhi.
Gusto usab sa grupo nga masabtan kung unsa ang nagdagan sa hunahuna sa mga pulis sa panahon nga nagpatuman sila og mga operasyon nga giingong miresulta sa liboan ka kamatayon, busa adunay mga eksperto nga kauban sa komisyon.
Mipasalig usab ang grupo nga protektahan ang identidad sa mga pulis ug dili kini makaapekto sa ilang padayon nga serbisyo.
Ang tanan niini, sumala ni Conde, idokumento sa Truth Commission, kauban ang mga testimonya sa mga biktima sa madugoong kampanya batok sa iligal nga droga.
