Namatay na si Felicien Kabuga, usa sa mga nag-unang suspek sa 1994 Rwandan genocide, samtang gihusay sa International Criminal Court (ICC) sa The Hague, matod sa United Nations.
Gikumpirma sa International Residual Mechanism for Criminal Tribunals nga si Kabuga namatay sa usa ka ospital kaniadtong Sabado, Mayo 16, sa edad nga 90.
Si Kabuga dugay nang giisip nga usa sa labing gipangita nga mga pugante sa kalibutan tungod sa iyang giingong papel sa pagpondo ug pagsuporta sa 1994 Rwandan genocide, diin gibanabana nga 800,000 ka mga tao ang namatay sulod lang sa pipila ka bulan.
Si Kabuga giakusahan nga usa sa mga nagpaluyo sa Radio-Television Libre des Mille Collines, o RTLM, usa ka estasyon sa radyo nga giingong nag-aghat sa etnikong Hutu sa pagpatay sa mga Tutsi atol sa genocide.
Dugang pa, gituohan usab nga siya nag-apod-apod og mga sundang ug misuporta sa mga grupo nga nalambigit sa daghang pagpamatay.
Niadtong 2020, si Kabuga gidakop sa Paris human sa halos tulo ka dekada nga pagtago-tago, giingong naggamit og lain-laing peke nga mga identidad ug mga pasaporte.
Human sa iyang pagkadakop, gibalhin siya sa The Hague diin nag-atubang siya og mga kaso sa genocide, conspiracy to commit genocide, incitement to genocide, ug mga krimen batok sa katawhan lakip na ang pagpatay ug pagpuo.
Hugot usab nga gipanghimakak ni Kabuga ang tanang mga kaso ug miangkon nga dili sad-an sa korte.
Niadtong 2023, gipahunong sa mga huwes ang husay human siya gideklara nga dili na maayo sa pisikal ug mental nga kahimtang sa pag-atubang sa husay.
Gimando sa presiding judge nga si Graciela Gatti Santana ang usa ka hingpit nga imbestigasyon sa hinungdan ug mga kahimtang sa kamatayon ni Kabuga.
