Posibleng nagtago si Ronald dela Rosa aron malikayan ang dayong pag-aresto may kalabotan sa giingong warrant sa International Criminal Court alang sa kasong crimes against humanity, sumala sa usa ka eksperto sa balaod.
Matod ni Mayong Aguja, usa sa mga principal author sa Republic Act No. 9851, adunay katungod ang gobyerno sa pag-facilitate sa pagsurender sa usa ka indibidwal nga adunay internasyonal nga warrant basta adunay pagtugot gikan sa Presidente. Gipasabot usab niya nga dili na kinahanglan pa ug bag-ong lokal nga warrant kon giila sa gobyerno ang kasamtangang warrant nga gipagawas sa ICC.
Dugang pa ni Aguja nga ang gitawag nga protective custody sa Senado posibleng dili magamit sa maong sitwasyon tungod kay limitado lamang kini sa mga kaso nga adunay silot nga dili molapas sa unom ka tuig ug usa ka adlaw.
Tungod niini, nanawagan si Aguja ug lawom nga imbestigasyon sa nahitabong pagpamusil sa Senado ug giawhag ang publiko nga magpabiling mabinantayon sa mga kasamtangang isyu sa nasud, ilabina sa mga panghitabo nga may kalabotan sa seguridad ug proseso sa balaod.
