Nadakpan sa kapulisan ang usa ka lalaki human misulay og palayo sa checkpoint sa Barangay Sinawal, General Santos City, alas 6:30 sa buntag Oktubre 16.
Giila ang suspek sa alyas nga “Borj,” legal ang edad ug residente sa Barangay Labangal sa maong siyudad, nga unang gipara sa checkpoint sa Crossing Litan tungod sa giingong pagdrayb og motorsiklo nga walay helmet, apan midagan hinuon ug mipaspas sa iyang pagbiya.
Gisundan dayon siya sa mga police personnel pinaagi sa hot pursuit operation hangtod nadakpan sa Purok Yusaville, diin narekober gikan sa iyang gray belt bag ang usa ka kalibre 45 nga pistola, usa ka magasin nga adunay upat ka bala, ug duha ka pakete sa gidudahang shabu.
Gibanabanang mitimbang og pito ka gramo ang gidudahang ilegal nga droga nga nagkantidad og 47 mil ug 600 pesos base sa Dangerous Drugs Board o DDB.
Giingong mahimong atubangon sa suspek ang mga kasong paglapas sa Article 151 sa Revised Penal Code, Section 11 sa Republic Act 9165 o Comprehensive Dangerous Drugs Act, ug Republic Act 10591 o Comprehensive Firearms and Ammunition Regulation Act.
Gipahibalo ang suspek sa hinungdan sa iyang pagdakop ug sa iyang mga katungod ubos sa balaod sa pinulongang iyang nasabtan, sa wala pa gidala sa Dr. Jorge P. Royeca Hospital alang sa medical ug physical examination ug sa sunod nga mga proseso sa kustodiya.
