Patay ang duha ka mag-uuma sa Barangay Datal Anggas, Alabel, Sarangani Province, human nalumos sa ilahang tradisyonal nga ritwal nga gitawag og “Sulif” sa Glamang River karong adlawa.
Giila ang mga biktima nga sila si Tonny Bulanon Mansag, 69 anyos, minyo, ug residente sa Sitio Ulo Tubay, ug Gaspar Tusan Palasanon, 49 anyos, minyo, ug residente sa Sitio Katimbol, nga parehas nagpuyo sa Barangay Datal Anggas.
Base sa inisyal nga imbestigasyon sa Alabel Municipal Police Station, boluntaryong miadto ang duha sa maong suba aron ipahigayon ang tradisyonal nga ritwal nga giingong may kalabotan sa panagbangi bahin sa usa ka luna sa yuta.
Atol sa maong ritwal, pareho silang nagpabiling naunlod ilalom sa tubig. Human sa gibana-banang 12 minutos, nakasinati ang duha og kalisod sa pagginhawa.
Gidali sila ug dala sa ilang mga ka tribu ngadto sa Sarangani Provincial Hospital alang sa medikal nga pagtagad apan gideklara kini nga dead on arrival si Mansag sa iyang doktor, samtang namatay usab si Palasanon human sa pipila ka oras nga pagpabilin sa ospital.
