Wala gikonekta sa Department of the Interior and Local Government (DILG) ang usa ka drug syndicate nga nakabase sa Davao sa nasakmit nga gidudahang kargamento sa shabu nga nagkantidad og P3.5 billion sa Laos.
Matud ni Interior Secretary Jonvic Remulla, nakapunting ang imbestigasyon sa pag-ila sa mga indibidwal nga posibleng nalambigit sa maong kalihokan, samtang ang Golden Triangle na ang giila nga gigikanan sa 521 ka kilo nga gidudahang shabu.
Giila sa mga awtoridad si kanhi Bangsamoro parliament member Edrieza Hadji Nasser Rimbang isip suspek nga gidudahang maoy mipondo sa pag-abang sa pribadong eroplano nga unta magdala sa ilegal nga droga gikan sa Laos paingon sa Manila.
Bisan pa niini, wala pa isirado sa mga imbestigador ang posibilidad nga adunay ubang personalidad nga nalambigit sa maong operasyon.
Gipasabot usab ni Remulla nga wala pay napamatud-ang koneksiyon si kanhi Pangulong Rodrigo Duterte sa giingong smuggling operation.
Nagpadayon ang Philippine National Police (PNP) ug Philippine Drug Enforcement Agency (PDEA) sa pag-ila sa mga posibleng nalambigit ug sa ilang mga transaksiyong pinansyal, samtang gihulat ang resulta sa laboratory examination sa Laos aron makumpirma ang matang sa substansiyang nakumpiska.
