Posible pang mosaka ang temperatura sa General Santos City ug ubang bahin sa SOCCSKSARGEN Region samtang nagpadayon ang dry season sa nasod.
Sumala kang Binrio Binan, chief meteorologist sa PAGASA Gensan, mas mabati pa ang kainit ug kaigang sa mosunod nga mga adlaw tungod sa epekto sa init nga panahon.
Matud pa niya nga posible nga muabot hangtod sa 44 degrees Celsius ang heat index, nga delikado sa panglawas ug mahimong hinungdan sa mga sakit sama sa heat stroke ug dehydration.
Tungod niini, nagpahimangno ang PAGASA sa publiko nga likayan ang dugay nga pagpabilin ilawom sa init nga adlaw, ilabi na sa udto hangtod hapon.
Giawhag usab ang tanan nga pirming moinom og igo nga tubig ug magsul-ob og presko nga sinina aron malikayan ang mga sakit dala sa grabeng kainit.
Padayon usab nga ginabantayan sa PAGASA ang kahimtang sa panahon aron mapahibalo dayon ang publiko sa posibleng pagtaas pa sa temperatura sa rehiyon.
