Nagrekomendar ang National Bureau of Investigation (NBI) sa pagpasaka og tulo ka ihap sa grave threat ug usa ka ihap sa inciting to sedition batok kang Bise Presidente Sara Duterte.
Kini human sa iyang giingong mga hulga batok kang Presidente Ferdinand Marcos Jr., Unang Ginang Liza Araneta-Marcos, ug kanhi House Speaker Martin Romualdez.
Wala gidawat sa NBI ang pagpasabot sa Bise Presidente nga ang iyang hulga sa pagpatay kay “kondisyonal” lamang.
Sumala sa NBI, klaro gikan sa konteksto sa iyang mga pahayag nga siya adunay tuyo nga manghadlok ug magpasabot og seryosong hulga.
Dugang pa, ang ahensya nagrekomendar usab og kaso sa inciting to sedition kalabot sa mga pahayag ni Sara Duterte niadtong Oktubre ug Nobyembre 2024 atol sa usa ka online press briefing, diin giingong nagpahayag siya og grabeng kasuko ngadto sa gobyerno ug sa mga opisyal niini.
Sa affidavit sa NBI, giingon nga ang mga pahayag sa Bise Presidente mahimong makapukaw sa kawalay katagbawan sa gobyerno ug magduso sa publiko sa pagpakigbatok sa mga awtoridad.
Sumala sa pipila ka miyembro sa House Committee on Justice, ang affidavit mahimong magsilbing importanteng ebidensya sa impeachment proceedings batok kang VP Sara.
Padayon usab nga nakigkomunikar ang Bombo Radyo sa kampo ni VP Sara Duterte.
