GENSAN – Nakasinati ug kusog nga ulan ug pagpangilat ang Dakbayan sa Heneral Santos karong kagabihona nga gikalipay sa pipila ka mga residente human sa pila ka semana nga grabeng kainit ug uga nga panahon.
Bisan pa sa pag-ulan nga naghatag ug kahupayan sa kainit, nagpahimangno ang City Disaster Risk Reduction and Management Office (CDRRMO) sa publiko nga mag-amping tungod sa posible nga kauban niini nga peligro sama sa flash flood, pagdagsang sa tubig, ug lightning strikes.
Gipahinumdoman sa CDRRMO ang mga residente nga likayan ang pagpabilin sa open areas o ilalom sa kahoy samtang nagkilat, ug siguruhon ang kaluwasan sa panimalay ilabi na sa mga lugar nga prone sa baha.
Gisugyot usab sa ahensya nga magpabiling alerto ug sundon ang mga abiso sa lokal nga panggamhanan ug mga emergency updates aron malikayan ang aksidente ug kadaot.
