Nagtaho ang Philippine National Police (PNP) nga moabot sa 287 sa 14,529 ka mga gasolinahan sa tibuok nasud ang temporaryong nagsira tungod sa kakulang sa suplay nga may kalabutan sa panagbangi sa Middle East.
Samtang, sumala ni PNP chief Jose Melencio Nartatez Jr., ang kapulisan nagpadayon sa pagmonitor sa mga insidente sa “gas-and-run” sa nagkalain-laing lugar, lakip na ang Metro Manila.
Bisan tuod ang natala nga mga insidente giisip gihapon nga “isolated cases,” iyang gipasiugda nga ang PNP dili kampante.
Si Nartatez miingon nga ilang gisusi ang mga sumbanan aron malikayan nga kini mahimong usa ka komon nga modus operandi.
Sa usa ka press briefing niakagahapong adlawa ang PNP Spokesperson nga si Randulf Tuaño miingon nga moabot sa 77 ka mga tawo ang nadakpan tungod sa nagkalain-laing mga krimen nga may kalabutan sa gasolina, sama sa hoarding ug profiteering.
