Giklaro sa kampo ni Bise Presidente Sara Duterte nga ang giingong kawalay kwarta ug deposito sa bangko sa iyang Statements of Assets, Liabilities, and Net Worth (SALN) gikan sa 2019 hangtod 2024 wala magpasabot nga wala kini gideklara.
Sumala ni Atty. Michael Poa, tigpamaba sa depensa sa Bise Presidente, ang maong mga kabtangan gihugpong ubos sa kategoryang “uban pa” sa seksyon sa personal nga mga kabtangan sa SALN.
Gipasabot niya nga imbes nga ilista kini usa-usa, ang kwarta, alahas, ug uban pang personal nga mga kabtangan gigrupo sa usa ka linya nga aytem.
Nibutho ang isyu human sa hearing sa House justice committee sa mga reklamo sa impeachment batok kang Duterte, diin namatikdan sa mga magbabalaod nga walay lahi nga deklarasyon sa cash on hand o bank deposits sa iyang SALN gikan sa 2019, bisan pa man nga ang iyang net worth misaka gikan sa mga P55 milyon sa 2019 ngadto sa P88 milyon sa 2024.
Gikumpirma usab sa SALN custodian sa Office of the Ombudsman nga base sa gisumite nga dokumento, walay lahi nga statement sa cash o deposits niadtong mga tuiga.
Bisan pa, ang kampo ni Sara Duterte miingon nga ilang ipasabut sunod kung nganong nausab ang paagi sa pagpresentar sa iyang SALN, tungod kay sa miaging mga tuig, ang cash gilista nga gilain.
Giinsistir sa iyang abogado nga ang kombinasyon sa parehas nga mga klase sa personal nga mga kabtangan sa SALN gitugot ug nga kini dili usa ka indikasyon nga ilang gitago ang bahandi ni VP Sara.
Si VP Duterte kaniadto miingon nga ang iyang service record “limpyo” ug nga ang tanan niyang mga kabtangan adunay legal nga gigikanan ug katugbang nga mga dokumento.
