Galaum si South Cotabato Governor Reynaldo Tamayo nga mahimong epektibong solusyon sa nagkataas nga presyo sa gasolina ang plano sa probinsya nga mag-import ug dako nga volume sa fuel, isip lakang aron mapakunhod ang epekto niini sa katawhan.
Sumala sa gobernador, gitarget sa maong inisyatibo ang pagpasulod og 100,000 ka bariles sa gasolina, o katumbas sa kapin 120 milyones ka litro. Kini nga kantidad gilauman nga makahatag og igong suplay nga makatabang sa pag-stabilize sa presyo sa merkado sa probinsya.
Apan gipatin-aw ni Tamayo nga wala pa’y pinal nga presyo sa maong gasolina nga ibaligya sa publiko, tungod kay nagapadayon pa ang koordinasyon ug partisipasyon sa daghang pribadong sektor nga maapil sa implementasyon sa proyekto.
Sa karon, naghulat pa ang provincial government sa permit gikan sa Department of Energy (DOE), nga gilauman nilang maaprubahan sulod sa sunod semana. Sa higayon nga mahatagan og klarong go signal, dayon nilang sugdan ang importasyon ug distribusyon sa gasolina padulong sa Pilipinas.
Gipasiugda usab sa gobernador nga seryoso ang ilang paningkamot sa pagpaubos sa presyo sa gasolina, isip tubag sa nagkataas nga gasto sa panginabuhi, ug isip paagi sa paghatag og direkta nga benepisyo sa katawhan sa South Cotabato.
