GENSAN- Gipasigarbo sa CSWDO Solo Parent focal person nga si Mark Jay Olitoquit nga nanguna ang General Santos City sa tibuok Pilipinas sa pagpatuman sa ordinansa alang sa Solo Parent Welfare ubos sa RA 11861.
Matud pa niya, ang maong lakang naghatag og lig-on nga suporta sa mga solo parent pinaagi sa 7-day parental leave nga magamit sa pribado ug pampublikong sektor aron makatambong sa mga kalihokan sa ilang mga anak.
Lakip usab sa benepisyo ang P1,000 cash subsidy para sa mga low-income solo parents isip dugang tabang sa ilang adlaw-adlaw nga panginahanglan.
Gipasabot niya nga ang GenSan usa sa unang LGU sa nasud nga nakapanday og ordinansa ug naggahin og pondo alang niini nga programa.
Sa pagkakaron, naghulat na lang ang lokal nga panggobyerno sa publikasyon sa ordinansa ug pagkompleto sa Implementing Rules and Regulations (IRR) alang sa hapsay nga pagpatuman.
Giila kini isip dakong lakang sa pagpalig-on sa proteksyon ug suporta sa mga solo parent sa syudad.
