Gipahayag ni Orly Sabelita, chairman sa Gensan Federation of Transport Cooperative, nga ang financial assistance sama sa fuel subsidy sa gobyerno nga “band-aid solution” lamang ug dili makahatag og malungtaron nga solusyon sa problema sa sektor sa transportasyon.
Matod ni Sabelita, ang cash assistance nga sama sa ₱5,000 makatabang lang sa mubo nga panahon apan dili kini igo aron masulbad ang padayon nga pagsaka sa gasto sa operasyon sa mga drayber ug operators.
Iyang gitudlo nga ang Service Contracting Program ang usa sa giisip nilang mas long-term nga solusyon, kay kini makahatag og mas lig-on ug padayon nga suporta sa mga transport workers, ilabi na kung molungtad og hangtod tulo ka bulan ang implementasyon.
Apan giangkon usab niya nga adunay kalisod sa pagpatuman niini tungod kay wala pa hingpit nga nagawas ang guidelines ug daghan pa ang kinahanglan nga proseso nga asikasuhon sa gobyerno.
Gipasiugda niya nga importante nga masulbad dayon ang administrative issues aron mas mapaspasan ang tabang sa mga transport stakeholders nga padayon nga naapektuhan sa fuel price changes ug operational costs
