GENSAN- Gipahugtan karon ni P/Maj. Robert B. Fores, hepe sa Tinagacan Police Station, ang ilang pagpatrolya matag gabii aron hingpit nga mapahunong ang illegal drag racing sa Barangay Katangawan.
Sumala ni Fores, dili lang kini usa ka saad kondili usa ka lig-on nga commitment ngadto sa mga lumulupyo ug sa mga biyahidor nga naggamit sa maong 8-lane highway.
Laraw sa kapulisan nga sutaon kon kinsa ang mga organizer ug mga tawong nagpaluyo niining maong mga lumba nga sagad ginahimo gikan sa tungang gabii hangtod kadlawon.
Nanawagan usab ang hepe sa komunidad nga makig-alayon ug mohatag og impormasyon kon adunay mamatikdan nga susamang aktibidad sa ilang dapit.
Pinaagi niining agresibong lakang, tinguha sa Station 8 nga makuha ang hingpit nga kontrol sa dalan aron masiguro nga wala nay drag racing nga mahitabo sa tibuok nilang nasakupan.
