MALUNGON, SARANGANI – Mokabat sa gibana-bana nga P600,000 ang danyos human nangamatay ang 33 ka mga baboy sa usa ka disgrasya nga nahitabo karong adlawa, Abril 14, alas 6:17 sa buntag sa National Highway sa Sitio San Roque, Barangay Nagpan, Malungon.
Base sa imbestigasyon, mokabat sa 150 ka mga baboy ang karga sa truck nga gimaneho ni Carlo C. Padohinog Jr., 44 anyos, residente sa Surallah. Padulong na unta sa Davao City gikan sa Gensan ang maong sakyanan sa dihang kalit kini nga nawad-an og preno.
Tungod niini, wala na makontrol sa drayber ang truck hangtod nga kini natumba sa dalan. Ang helper nga si Dindo Cadiz, 40 anyos ug residente sa Norala, angol usab sa maong insidente ug gidala dayon sa duol nga balay tambalanan.
Padayon ang imbestigasyon sa mga otoridad aron matino ang dugang pang hinungdan sa aksidente samtang ginatan-aw usab ang kahimtang sa sakyanan ug pagsunod sa safety measures sa biyahe.
