GENSAN- Padayon ang imbestigasyon sa kapulisan human makaplagan ang patay’ng lawas sa 40-anyos nga lalaki nga gidunggab sa sayong kabuntagon sa usa ka subdivision sa General Santos City niadtong milabay nga adlaw.
Giila ang biktima nga si Hagler Pontejo, residente sa Purok Lower Matibay, Tusaville, Brgy. San Isidro, Gensan.
Sumala ni P/Maj. Ivan Charles F. Abastillas, station commander sa San Isidro Police Station, nga ang biktima adunay kondisyon sa pangisip ug kanunay nilang ginarespondehan tungod sa iyang pag-ikyas niini sa ilang balay ug pagsulod sa ubang kabalayan.
Nahitabo ang krimen alas 2:46 sa kadlawon diin nakaplagan na lamang ang biktima nga nagkadugo ug wala nay kinabuhi.
Wala’y narekord nga CCTV footage tungod brownout niadtong orasa, busa nagsalig karon ang kapulisan sa mga pahayag sa mga eyewitness.
Padayon ang imbestigasyon aron mailhan ug madakpan ang suspek sa maong krimen.
