GENSAN- Gipasabot ni Mayor Lorelie G. Pacquiao nga ginatan-aw na sa lokal nga panggamhanan ang posibilidad sa paghatag og fuel subsidy alang sa mga delivery riders.
Sumala niya, nagpadayon na ang profiling nga ginahimo sa matag barangay aron mailhan ang mga benepisyaryo, lakip ang mga sikad ug habal-habal drivers.
Bisan pa niini, wala pa kini opisyal nga gi-anunsyo tungod kay ginatan-aw pa ang igo nga pondo alang sa maong programa.
Matud pa sa mayor nga nagkuha na sila og mga lakang aron matabangan ang nagkalain-laing sektor nga naapektuhan sa pagsaka sa presyo sa lana.
Iyang giila nga dili lamang ang mga driver kundili ang tanang katawhan ang apektado sa pagsaka sa presyo sa gasolina ug mga palaliton.
Dugang pa niya, ginasiguro sa lokal nga gobyerno nga ang tanang proseso mahimong legal ug husto sa dili pa ipatuman ang bisan unsang ayuda.
