Walay nakitang krisis o pagsaka sa presyo sa mga palaliton sa Malaysia, sumala sa usa ka OFW nga didto nagpuyo.
Matud ni Mary Grace Basaic Bombo International Correspondent sa Malaysia nga lahi ang sitwasyon sa nasud kumpara sa ubang lugar tungod kay kontrolado ang presyo sa petrolyo ug dili kaayo mabug-atan ang publiko sa galastuhon. Iyang gihulagway nga “bastante” o igo ang supply sa petrolyo sa ilang nasud.
Gipasabot usab niya nga usa sa rason nganong walay kakulang o shortage sa lana mao ang lokal nga produksyon gikan sa Sabah, usa sa mga lugar nga adunahan sa natural nga kahinguhaan sa petrolyo. Dugang pa, adunay suporta gikan sa silingang Brunei nga usa usab ka oil-producing country.
Tungod niini, nagpabiling stable ang suplay sa enerhiya sa Malaysia, nga naka-tabang aron malikayan ang pagsaka sa presyo sa mga palaliton ug maprotektahan ang ekonomiya batok sa posibleng krisis.
Giawhag usab ang publiko nga sabton ang kalainan sa sitwasyon sa matag nasud ilabi na sa suplay sa enerhiya, nga usa sa dakong hinungdan sa pagtaas o pag-ubos sa presyo sa mga batakang panginahanglanon.
