Nagpahayag sa dakong kasubo si Tony Guinang, igsoon ni Willie Guinang, human iyang gikumpirma nga ang lawas nga nakaplagan sa Barangay Alegria, Alabel, Sarangani Province ang sa iyang manghod.
Sumala kang Tony, dako ang ilang kasubo tungod sa kalit nga panghitabo ug sa kamatuoran nga wala nila matabangi ang biktima aron malikayan unta ang maong trahedya.
Matud pa niini, wala sila makadahom nga mosangko sa ing-ani nga sitwasyon ang kinabuhi sa iyang igsoon.
Gipasabot usab niya nga lisod kaayo alang sa ilang pamilya ang pagdawat sa nahitabo, ilabina nga sunod-sunod ang mga panghitabo nga misangpot sa kamatayon ni Willie.
Bisan pa man sa kasakit, matud ni Tony nga ila na lamang dawaton ang kapalaran tungod kay wala na silay mahimo pa. Ang ilang prayoridad karon mao ang paghatag og husto ug desenteng lubong sa ilang kabanay aron mapahulay kini sa hustong paagi.
Samtang nagpadayon ang imbestigasyon sa kapulisan, naglaum ang pamilya nga matubag ang tanang pangutana ug mahatagan og kahayag ang tinuod nga hinungdan sa kamatayon sa biktima.
