MALAPATAN, SARANGANI – Naglusad ang Malapatan Municipal Police Station og importante nga kalihokan pinaagi sa ilang community outreach program nga Project PAGES (Police Advancing Growth through Education and Services) diin mibisita ang mga kapulisan sa pasilidad sa Bureau of Jail Management and Penology aron maghatag og nagkalain-laing klase sa libro ngadto sa dul-an 30 ka Persons Deprived of Liberty (PDLs).
Sumala ni PMaj Lloyd Levin D. Caigas, tumong sa proyekto nga mahatagan og oportunidad ang mga PDLs, kabatan-onan, ug uban pang katawhan sa komunidad sa pagpalambo sa ilang kahibalo ug pamatasan pinaagi sa pagbasa sa mga inspirasyonal, moral, ug edukasyonal nga sulod sa libro, samtang giingon usab nga ang edukasyon usa ka epektibong paagi sa personal nga pagbag-o ug preparasyon sa ilang pagbalik sa komunidad.
Atol sa kalihokan, naghatag si PMaj Caigas og mensahe sa paglaum ug pagdasig sa mga PDLs nga gamiton ang panahon sulod sa pasilidad aron mapaayo ang kaugalingon ug ipakita nga bisan kinsa adunay ikaduhang higayon basta adunay tinud-anay nga determinasyon sa pagbag-o.
