GENSAN – Gipahayag ni kanhing Senador Manny Pacquiao nga dili solusyon ang pagbiya o ‘pag-give’ up sa teritoryo sa Pilipinas taliwala sa isyu sa Kalayaan Island Group. Ang maong pahayag gisunod sa kontrobersyal nga sugyot ni Sen. Rodante Marcoleta nga ihatag na lamang sa China ang maong lugar aron matapus ang tensyon.
Matod ni Pacquiao, dili siya uyon sa ideya nga adunay “surrender” nga mahitabo ilabi na kung hisgutan ang soberanya sa nasud. Giingon niya nga daghang kinabuhi na ang nakabsan alang sa kalayaan ug demokrasya sa Pilipinas, busa dili angay nga basta na lamang kini isalikway.
Gikumparar usab niya ang sitwasyon sa iyang kasinatian sa boxing, diin wala gyud sa iyang hunahuna ang pag-surrender bisan pa sa lisod nga kahimtang sa ring. Sama sa usa ka manlalaban, giinsistir ni Pacquiao nga kinahanglan ipaglaban sa Pilipinas ang iyang katungod ug teritoryo sa Kalayaan Island Group, samtang padayon nga mangita og malinawon ug diplomatiko nga paagi aron masulbad ang panagbangi.
