Patay ang usa ka 66-anyos nga lalaki human giingong gibunalan og baseball bat sa ulo sa usa ka 31-anyos nga lalaki sa Purok Lower Puting Bato, Barangay Calumpang, General Santos City, niadtong Oktubre 11.
Giila ang biktima nga si Ramon Dela Cerna Condinato, minyo ug residente sa maong lugar, samtang ang giingong suspek mao si Jimmy Jimenez Omania, 31-anyos.
Base sa inisyal nga imbestigasyon sa kapulisan, nag-awat ang biktima sa panaglalis sa magtiayon nga silingan ra usab sa mga nalambigit. Apan, misamot ang panaglalis hangtod nga aksidenting nasumbagan sa biktima ang suspek, nga anaa usab sa kilid samtang nag-awat sa duha nga naglalis.
Pipila ka minutos human miuli, mibalik ang suspek nga giingong nagdala og baseball bat ug gibunalan sa ulo ang biktima, hinungdan sa pagkatumba niini.
Gidala dayon sa pamilya ug mga silingan ang biktima sa Dr. Jorge P. Royeca Hospital alang sa medikal nga pagtagad, apan nakabsan gihapon kini sa kinabuhi.
Samtang, gitugyan sa mga silingan ang suspek ngadto sa kapulisan alas-11:45 sa buntag niadtong Oktubre 12. Gidala kini sa Police Station 10 alang sa hustong dokumentasyon ug disposisyon.
Narekober usab sa kapulisan ang giingong baseball bat nga gigamit sa insidente.
Base sa report sa kapulisan, giandam na ang mga dokumento alang sa pagsang-at sa tukmang kaso batok sa suspek.
