GENSAN- Patay ang usa ka 66 anyos nga lalaki human giingong gibunalan sa ulo gamit ang baseball bat sa usa ka 31 anyos nga lalaki sa Purok Lower Puting Bato, Barangay Calumpang, General Santos City.
Ang biktima giila nga si Ramon Dela Cerna Condinato, minyo nga residente sa lugar, samtang ang giingong suspek giila nga si Jimmy Jimenez Omania, 31-anyos.
Base sa inisyal nga imbestigasyon sa kapulisan, ang biktima miapil sa panaglalis tali sa silingan.
Apan, ang panaglalis migrabe hangtod nga aksidente nga nasumbag sa biktima ang suspek, kinsa naa ra usab sa duol samtang miapil sa panaglalis.
Pipila ka minuto human makauli, mibalik ang suspek nga giingong nagdala og baseball bat ug gibunalan ang biktima sa ulo, hinungdan sa iyang pagkatumba.
Gidala dayon ang biktima sa iyang pamilya ug mga silingan sa ospital alang sa medikal nga atensyon, apan gideklara gihapon siyang patay.
Samtang, gisurender sa mga silingan ang suspek sa kapulisan ug naa na siya karon sa kustodiya sa Police Station 10.
Nakuha usab sa kapulisan ang giingong baseball bat nga gigamit sa insidente.
Base sa report sa pulis, giandam na ang mga dokumento alang sa pagpasaka sa angay nga mga kaso batok sa suspek.
Samtang sa pakighinabi sa Bombo Radyo Gensan, gibutyag ni Melchora Condinato, asawa sa biktima, kinahanglan nga manubag ang suspek aron mahatagan og hustisya ang nahitabo sa iyang bana.
