GENSAN- Gipahinumdoman sa City Health Office sa General Santos City ang mga ginikanan sa importansya sa tulo ka bakuna nga gihatag ubos sa ‘School-Based Immunization’ o ‘SBI Program’ aron mapanalipdan ang mga bata batok sa nagkalain-laing sakit.
Lakip niini ang ‘Human Papillomavirus’ o HPV vaccine nga makatabang sa pagpanalipod batok sa HPV infection nga mahimong hinungdan sa ‘cervical cancer’ ug uban pang sakit nga may kalabutan niini.
Ang ‘Measles-Rubella’ o MR vaccine, alang usab sa proteksyon batok sa tipdas ug rubella, samtang ang ‘Tetanus-Diphtheria’ o Td vaccine makatabang sa paglikay sa tetanus ug diphtheria nga mahimong makamatay kon dili matambalan.
Sumala sa City Health Office, mas maayong mapugngan ang mga sakit pinaagi sa pagbakuna kaysa maghulat pa nga magkasakit ang mga bata.
Giawhag usab ang mga ginikanan nga suportahan ang ‘school-based vaccination program’ ug ibalik ang consent form aron mahatagan og bakuna ang ilang mga anak subay sa programa.
Gibutyag nga importante ang pagbakuna isip lakang sa pagpanalipod sa panglawas ug kaugmaon sa mga kabatan-onan.
