GENSAN – Hustisya ang singgit sa pamilya sa usa ka 21-anyos nga dalaga human kini gidunggab sa makadaghang higayon sulod sa ilang panimalay sa Purok DBP, Barangay Apopong, Gensan og nakaplagan ang patayng lawas niini sa iyang kwarto kagahapon, pasado alas 8 sa buntag.
Giila ang biktima nga si Miyukie Kim, college graduating student sa Mindanao State University-Gensan.
Sa inisyal nga imbestigasyon sa kapulisan, nasuta nga nakaangkon ug daghang samad dinunggaban ang biktima hinungdan sa iyang kamatayon.
Hilabihan ang kasubo sa pamilya ni Miyukie ug naghangyo sila sa mga awtoridad nga ihatag ang hustisya ug masilotan ang responsable sa krimen.
Giangkon ni Police Major Jethro Doligas, hepe sa Makar Police Station, nga adunay sila’y gipang-imbitar nga mga indibidwal alang sa initial questioning kalabot sa kaso.
Apan iyang giklaro nga wala pa silay giila nga person of interest samtang padayon pa ang ilang beripikasyon aron masayran ang motibo ug mailhan ang responsable sa pagpatay kang Miyukie.
