GENSAN – Gibisita ni City Mayor Lorelie Geronimo Pacquiao kagahapong adlawa ang Purok San Juan, Barangay Calumpang aron personal nga makigkumusta sa 18 ka pamilyang nawad-an og panimalay tungod sa sunog kaniadtong Sabado, Nobyembre 29.
Base sa inisyal nga report, mokabat sa 70 ka indibidwal ang apektado, lakip ang mga bata ug tigulang, nga karon temporaryong nagpasilong sa GKK San Juan evacuation area.
Gisiguro ni Mayor Pacquiao nga hatagan dayon og ayuda ang mga biktima aron matubag ang ilang nag-unang panginahanglan. Iyang gipahibalo usab nga mobalik siya karung adlawa aron personal nga ihatud ang dugang nga tabang.
Padayon ang koordinasyon sa lokal nga gobyerno ug nagkalain-laing ahensya aron mapaspasan ang pagbangon sa komunidad gikan sa trahedya.
