Wala munang pasok at sesyon sa Senado nitong Lunes, upang bigyang-daan ang paglilinis at assessment matapos ang naganap na sunog sa gusali.
Hindi naman sakop ng suspensyon ang mga empleyado mula sa security, maintenance, at general services na patuloy na naka-duty upang matiyak ang kaligtasan at kaayusan sa loob ng compound.
Tiniyak ni Senate President Vicente “Tito” Sotto III na walang nasirang mahahalagang dokumento dahil sa insidente.
Ayon sa Bureau of Fire Protection (BFP), nagsimula ang sunog sa ikalawang palapag ng gusali at agad na naapula matapos ang mahigit isang oras na operasyon ng mga bombero.
Batay sa paunang ulat, tinatayang nasa P1.2 milyon ang halaga ng pinsala sa ilang opisina at kagamitan.
Patuloy ang imbestigasyon ng BFP at Senate Sergeant-at-Arms upang matukoy ang sanhi ng sunog at ang kabuuang lawak ng pinsala.
Nanawagan naman ang pamunuan ng Senado sa publiko na manatiling kalmado at tiniyak na magpapatuloy ang kanilang mga gawain sa sandaling matapos ang paglilinis at masiguro ang kaligtasan ng gusali.
