GENSAN – Gipangbungkal sa mga sakop sa 1205th ug 1201st Maneuver Company sa Regional Mobile Force Battalion 12 ang kapin 11,500 ka tanom nga marijuana nga nagkantidad og P2.3 milyon atol sa operasyon sa Barangay Miasong, Tupi, South Cotabato niadtong Oktubre 19.
Ang operasyon gipangulohan nila PCPT Joebart S. Barrios ug PCPT Crispolo Caparida Baba Jr. ubos sa superbisyon ni PLTCOL Argel N. Ancheta.
Nasuta sa mga otoridad ang tanom sa usa ka 1.5-hectare nga luna sa Sitio Benigno Aquino ug dayon nilang gitawag ang Tupi MPS ug PDEA Region 12 aron magsugod sa Marijuana Eradication Operation.
Sa operasyon, giibot ug gisunog dayon sa lugar ang tanang mga tanom nga marijuana.
Usa ka suspetsado nga gituhuang nagtanom niini ang nakapalingkawas ug karon gipanuki sa kapulisan.
Gitakdang pasakaan kini og kaso sa paglapas sa Section 16, Article II sa Republic Act 9165 o Comprehensive Dangerous Drugs Act of 2002.
