SARAGANI – Gi-awhag ni Police Colonel Jerone Orville Panganiban, Provincial Director sa , Provincial Director sa Sarangani Police Provincial Office (SPPO)ang tanang gagmay’ng tindahan nga undangon na ang pagpamaligya og illegal nga sigarilyo.
Matud pa sa opisyal, mao kini ang pinakaunang lakang aron masumpo ang operasyon ug pagpanghatag sa ginadili nga sigarilyo nga walay klarong papeles ug nagalapas sa balaod.
Dugang pa ni Col. Panganiban, kon padayon nga paliton sa mga konsumidor ang mga sigarilyong ilegal, magpadayon usab ang mga tago-tago nga pagpanglusot niini sa merkado.
Ang resulta, lisod gyud masumpo ug mapalong ang iligal nga kalihokan.
Gipasabot usab sa opisyal nga gikinahanglan ang hugot nga kooperasyon sa mga tindero ug sa katawhan aron magmalampuson ang kampanya batok sa pagpanghatag ug pagbaligya sa mga ilegal nga produkto.
Ang pagbaligya ug pagpalit niini dili lamang makadaot sa ekonomiya ug makapakunhod sa kita sa gobyerno, apan mahimong mosuporta pa sa organisadong kriminalidad nga nagagamit sa pagpanglusot sa mga kontrabando.
Sa pagkakaron, nagpahinumdom ang kapulisan nga padayon ang ilang operasyon ug inspeksyon aron masiguro nga mosunod ang tanan sa balaod ug mapanalipdan ang publiko gikan sa mga ilegal nga kalihokan.
