GENSAN- Nagpahayag si Atty. Rey Cartojano nga padayon nang nagkakusog ang pagbantay ug pagbatikos sa publiko batok sa mga anomalya nga naglibot sa mga proyekto sa flood control sa nasud.
Matod pa niya, mas komplikado na karon ang pamaagi sa pagtabon sa mga kalapasan ug mas klaro nga gipugngan ang katungod sa katawhan sa pagpakita sa ilang opinyon ug kabalaka.
Bisan pa man sa tanang bahad, giingon ni Cartojano nga dili na mapugngan ang katawhan sa ilang pagpakita sa kagool ug panawagan sa hustisya.
Giila niyang kusog karon ang social media ug mga grupo sa civil society nga aktibong nagabantay ug nagduso sa transparency sa tanang proyekto.
Gipahimangnoan usab niya ang posibilidad nga mahimong molihok ang Malacañang pinaagi sa mas istrikto nga mga lakang kung magpadayon ang kasamok ug kakulangan sa hustisya.
Apan iyang gilauman nga ang administrasyon ni Presidente Ferdinand “Bongbong” Marcos Jr. dili na mosangpot sa Martial Law, kondili molihok sa tinuod nga reporma ug aksyon.
Nagpabilin ang paglaum ni Cartojano nga matubag ang mga isyu pinaagi sa limpyo ug tinud-anay nga pamaagi, imbes nga sulbaron pinaagi sa pwersa.
“Kon seryoso ang liderato sa pagpangandam ug serbisyo, kinahanglan ipakita nila kini sa mga proyekto nga adunay dakong epekto sa katawhan sama sa flood control,” dugang pa.
Sa pagkakaron, padayon ang daghang isyu sa dagkong proyekto sa flood control, diin daghan kaayong pondo ang gigahin, apan nagbilin gihapon og pangutana kung unsaon kini mahimong epektibo alang sa katawhan.
