Makonsidera ni Senador Ping Lacson nga ang Bulacan maoy labing ilado sa mga anomalosong proyekto sa pagpugong sa baha.
Sa iyang privilege speech, gibutyag sa senador ang kurapsyon sa duha ka gitaktak nga district engineers sa Bulacan First Engineering Office nga sila si kanhi District Engineer Henry Alcantara ug ang mipuli kaniya nga si kanhi Assistant District Engineer Brice Hernandez.
Matod sa senador nga ubos sa pagpangulo niining duha sa nasangpit nga buhatan, 28 ka mga proyekto alang sa tuig 2024 ang adunay managsamang kantidad sa pundo bisan og matod niya managlahi ang gidak-on sa mga proyekto nga himuon.
Gikataho pa nga ang usa kanila makadaog og gatusan ka milyon sa usa ka casino sa Manila.
Gisaway usab ni Lacson ang kuwestiyonableng flood control project sa lungsod sa Arayat, Pampanga, human naguba na usab ang riverbank mitigation structure sa Candating bisan og makapila na kini giayo ug gipundohan sa gobyerno.
Gipasiugda ni Lacson nga ang pondo alang sa proyekto nagsugod niadtong 2018 nga adunay ₱20 million nga gigahin alang sa konstruksyon o rehabilitasyon sa slope protection sa Pampanga River, Candating Section, Arayat, Pampanga.
Apan, kini usab nahugno sa ulahi.
Gikan sa orihinal nga ₱20 milyones niadtong 2018, ang kinatibuk-ang gasto sa samang flood control structure niabot sa kapin sa ₱274.8 milyones—o pagtaas sa kapin sa 815% kon itandi sa unang konstruksyon.
Gihisgotan usab nga ang Eddmari Construction and Trading maoy kontraktor nga kanunay nga gi-hire alang sa proyekto.
Ang kompanya kaniadto naapil sa lainlaing mga kontrobersiya, lakip ang pagka-delist.
Sa laing bahin, dugang gibutyag sa senador nga 40% lang sa pundo ang maadto sa mga flood control projects.
Sa breakdown sa senador, 8-10% naa sa district engineers, 2-3% kay kickback sa district engineering office gikan sa sobra nga ganansya sa contractor, 5-6% sa mga miyembro sa Bids and Awards, 0.5-1% sa Commission on Audit, ug 20-25% sa funder o politiko nga nangitag pondo para sa proyekto.
