Gipa-blacklist ni Presidente Ferdinand Marcos Jr. ang SYMS Construction Trading, ang kontraktor sa flood control project sa Barangay Piel, Baliwag, Bulacan.
Matod sa Presidente, gawas sa blacklisting, mag-atubang usab ang kompanya og kaso ubos sa Revised Penal Code ug RA 3019 o ang Anti-Graft and Corrupt Practices Act.
Gipasalig sa Presidente nga dili niya palabyon ang nasangpit nga anomaliya ug gipasalig nga ang tanang opisyal nga nalambigit sa panagkunsabo masuspenso ug mapasakaan og kaso.
Mag-atubang usab sila og mga kalapasan sa Anti-Graft and Corrupt Practices Act, malversation of public funds, ug falsification of public documents.
Gibayran sa gobyerno ang mga ₱55 milyones alang sa konkretong river wall project sa Brgy. Piel, apan atol sa inspeksyon sa Presidente, walay bisan usa ka bungbong o bisan usa ka hollow block ang natukod.
Si Presidente Marcos midugang nga ang maong proyekto wala usab nalista sa mga flood control projects sa Department of Public Works and Highways (DPWH).
