Nagpadala ug sulat si Senate Minority Leader Tito Sotto kang Senate President Francis “Chiz” Escudero aron iduso ang pagpadayon sa random drug testing sa Senado.
Kini human sa insidente sa usa sa mga empleyado ni Senador Robin Padilla nga si Nadia Montenegro nga gikaingon nga migamit og marijuana sulod sa CR.
Ang sulat nagkanayon nga kaniadtong 2018, ang Senado nagpahigayon na og mandatory drug testing subay sa Republic Act 9165 o ang Dangerous Drug Act of 2002 ug Civil Service Commission Resolution no. 1700653 nga nagmando sa pagpatuman sa mandatory drug test sa mga opisyal ug empleyado niini.
Matud sa sulat ni Sotto, ang pagsumite sa mga opisyal ug empleyado sa drug test maoy magpamatuod ug magpabilin ang moral, integridad sa senado sa pagtubag sa mga isyu.
Sa laing bahin, nanghinaot ang senador nga gawas sa pagmintina sa integridad sa senado, makatabang usab ang drug test aron mapabilin nga drug-free workplace ang ilang mga buhatan.
