Gibutyag ni Cong. Terry Ridon nga ipapatawag sa umaabot nga imbestigasyon sa House of Representatives ang mga nag-unang kontraktor nga nagdumala sa dagkong flood control projects sa nasud.
Tumong niini nga masuta dili lamang ang kalidad sa ilang trabaho, apan lakip na usab ang hustong paggamit sa pondo sa gobyerno ug ang pagsunod sa mga kontraktwal nga kasabutan.
Matod ni Ridon, daghang reklamo nga nadawat gikan sa mga residente ug lokal nga opisyal nga may kalabotan sa pagka-atras sa implementasyon sa proyekto, kapalpakan sa disenyo, ug kakulang sa maintenance nga nagresulta sa padayon nga pagbaha bisan pa nga adunay multi million ka pesos nga pondo nga gigahin.
Iyang gipasiugda nga importante nga masayran kung adunay pag-abuso sa pondo, pagpasagad o dili patas nga pagpili sa kontraktor nga nakaapekto sa kalidad sa mga proyekto aron pagpugong sa mga pagbaha.
Gidugang pa sa kongresista nga ang mga kontraktor kinahanglan motubag sa tanang isyu ug motug-an sa tinuod nga estado sa mga proyekto aron mahatagan og klarong direksyon kung unsaon pag-ayo sa mga sayop ug pagpadayon sa mga proyekto nga makahatag ug tinuod nga proteksyon sa katawhan batok sa pagbaha.
