Misaka ang kaso sa Human Immunodeficiency Virus (HIV) sa dakbayan sa Heneral Santos, nga karon nag-una na sa tibuok rehiyon sa pinakataas nga natala nga kaso, base sa datos sa City Health Office (CHO).
Sumala ni Dr. Lalaine Calonzo sa CHO, usa sa mga rason sa pagtaas sa kaso mao ang kaaktibo sa ilang buhatan sa pagpangita og mga aktibong kaso o active case finding, nga naglakip sa agresibong community testing, outreach activities, ug confidential screening.
Ang CHO padayon nga naningkamot nga mapaabot ang impormasyon ug serbisyo ngadto sa mga high-risk nga sektor, lakip na ang mga kabatan-onan, mga OFW, ug LGBTQ+ community.
Sa pagkakaron, gipalig-on sa CHO ang ilang HIV awareness campaign pinaagi sa libreng HIV testing, pre- ug post-counseling, ug referral sa mga pasyente alang sa antiretroviral therapy (ART).
Gi-awhag sa CHO ang publiko nga magpa-test og sayo, kay mas sayo madiskobrehan, mas dali kini matambalan ug malikayan ang pagkaylap niini ngadto sa uban.
