Miabot na si Pangulong Ferdinand R. Marcos Jr. ning adlaw nga Lunes, Hulyo 21 sa Washington D.C. alang sa iyang pakig-meeting kang US President Donald Trump aron hisgutan ang mas lig-on nga relayon sa ekonomiya og seguridad sa duha ka nasod.
“My visit to Washington DC and most importantly, my meeting with President Trump, are essential in continuing to advance our national interests and strengthening our alliance,” pamahayag ni PBBM.
Mitugpa ang eroplano sa Presidente sa Joint Base Andrews alas 2:48 sa hapon, Domingo (2:48 a.m. Lunes, oras sa Manila), diin gidawat siya ni Philippine Ambassador to the US Jose Manuel Romualdez ug US Ambassador to the Philippines MaryKay Carlson.
Si Marcos ang labing una nga lider sa Southeast Asia nga nakigtagbo sa Presidente sa US nga si Donald Trump sukad nagsugod ang ulahi sa iyang ikaduhang termino kaniadtong Enero.
Sa wala pa mobiya sa Manila, ang Presidente miingon nga ang pagbisita nagpamatuod pag-usab sa malungtarong alyansa tali sa Pilipinas ug US, uban ang pagtutok sa pagpalig-on sa kooperasyon sa seguridad, pagpalambo sa pamatigayon ug pamuhunan, ug pagsuporta sa kalinaw ug kalig-on sa rehiyon.
Si Marcos ug Trump gilauman nga magpahigayon ug mga diskusyon sa pagpalig-on sa bilateral cooperation ilabina sa mga bahin sa ekonomikanhong kalamboan ug seguridad.
Makauban usab sa Pangulo silang U.S. Secretary of State Marco Rubio og U.S. Secretary of Defense Pete Hegseth aron hisgutan ang pagpakusog sa defense cooperation og regional stability.
