Nagpahimangno ang Department of Health – Region 12 (DOH-12) sa tanang katawhan nga mag-amping batok sa mga sagad nga viral diseases sama sa ubo, sip-on, ug uban pang respiratory infections, ilabi na karon nga nagasugod na ang pabag-bag-o sa panahon.
Sumala sa DOH-12, ang kasamtangang klima diin nagkasinumbagay ang kainit sa adlaw ug kalit nga ulan, makapaluya sa resistensya sa lawas ug mahimong hinungdan sa dali nga pagkaylap sa mga sakit nga dala sa virus.
Pinakaapektado niini mao ang mga kabataan, senior citizens, ug kadtong adunay daan na nga medikal nga kondisyon.
Gibutyag sa ahensya nga misaka ang ilang naitalang kaso sa upper respiratory infections sa pipila ka lugar sa rehiyon niining milabay nga mga semana.
Busa, gihangyo nila ang publiko nga magbantay ug sundon ang mga basic health protocols.
Gidasig usab ang mga lokal nga LGU nga ipadayon ang health education campaigns ug i-monitor ang kahimtang sa ilang mga barangay.
Ang DOH-12 nagpadayon sa paghatag og teknikal nga suporta ug tinguha nga malikayan ang pagsugod og outbreak.
Ang publiko gipasidan-an nga ang pag-amping dili lang responsibilidad sa gobyerno apan sa matag usa nga kabahin sa komunidad.
