GENSAN – Nakadawat og hinanaling tabang ang napulo’g siyam (19) ka pamilya sa Purok San Roque, Barangay Labangal human sila maapektuhan sa grabeng pagbaha tungod sa walay hunong nga ulan.
Personal nga mibisita sa lugar si Mayor Lorelie G. Pacquiao kauban si Social Committee Chairperson Brgy. Kagawad Graziel Pacquiao aron tan-awon ang sitwasyon ug ihatud ang tabang sa mga residente.
Ang paspas nga pagresponde gisugdan pagkahuman misumbong ang usa ka residenteng nabalaka sa kahimtang sa ilang lugar.
Human madawat ang impormasyon, gipa-deploy dayon ni Mayor Pacquiao ang mga representante sa syudad aron masuta ang sitwasyon ug matabangan dayon ang mga apektadong pamilya.
Nagpasalamat si Mayor Pacquiao sa City Social Welfare and Development Office (CSWDO), Barangay DRRM Unit sa Labangal, YPCM officers ug mga maintenance personnel sa ilang dali nga pag-validate ug pag-andam sa relief goods.
Nagpakita kini nga paningkamot sa tibuok city government nga seryoso ang ilang misyon sa pagpanalipod ug pag-alagad sa katawhan sa panahon sa katalagman.
