GENSAN- Gipahibalo ni Joel Gavina, General Manager sa Civil Aviation Authority of the Philippines (CAAP) Gensan, nga sa unang adlaw sa implementasyon sa Memorandum Circular No. 019-2025 nga bag-ong regulasyon sa airport partikular sa parking fees, dili malikayan ang mga negatibo nga reaksyon gikan sa katawhan apan daghan usab ang positibo ang pagtuman.
Ang maong polisiya kabahin sa singil sa parking fee sa tanang sakyanan nga mosulod sa Gensan International Airport, ingon man sa tanang airport nga ginadumala sa CAAP sa tibuok nasud.
Gibutyag ni Gavina nga libre ang ‘access pass’ sa mga sakyanan nga adunay CAAP-issued stickers, sama sa government vehicles ug taxi operators sa Gensan nga naka-avail sa ‘annual pass’ nga gihatag sa mga ahensya sa gobyerno.
Gipasalig sa CAAP nga ang tanang makolekta nga parking fee ang gamiton sa mga proyekto sa gobyerno nga ang publiko mismo ang makabenepisyo.
