Andam na ang four-division boxing champion Nonito Donaire alang sa iyang pagbalik sa boksing.
Iyang ikasangka si Andres Campos sa Chile alang sa interim WBA bantamweight title didto sa Argentina karong Hunyo 14.
Ang 42-anyos nga si Donaire gikan sa duha ka sunodsunod nga kapildihan, human napildi niadtong 2022 sa wala malalis nga junior featherweight champion nga si Naoya Inoue sa ikaduhang hugna sa ilang rematch.
Niadtong 2023, gipildi siya ni Alexandro Santiago pinaagi sa unanimous decision alang sa bakanteng WBO bantamweight title.
Katapusang kadaugan ni Donaire niadtong Disyembre 11, 2021 dihang iyang gipildi si Reynaldo Gaballo sa Round 4 aron depensahan ang iyang WBC bantamweight title.
Si Donaire adunay rekord nga 42 ka daog, walo ka pilde uban ang 28 ka knockouts samtang si Campos adunay 17 ka daog, duha ka pilde, usa ka tabla ug unom ka knockouts.
