Kapin sa 55.8 milyones o 81.65% sa mga rehistradong botante ang nakaboto sa 2025 Elections, sumala sa Commission on Elections (Comelec).
Matod ni Comelec Chairman George Garcia kini ang gikonsiderar nga pinakataas nga voter turnout sa kasaysayan sa midterm elections sa Pilipinas.
Kini giingong pamatuod sa aktibong partisipasyon sa publiko, ilabina sa mga batan-on, nga naglangkob sa dakong bahin sa mga botante, ug sa kaepektibo sa gipakusog nga visibility ug kampanya sa Comelec.
Base sa datos sa Comelec, 55,874,700 sa 68,431,965 ka mga rehistradong botante sa nasod ang nakaboto niadtong Mayo 12, 2025, mas taas kon itandi sa 75.90% nga turnout niadtong 2019.
Hinuon, giklaro sa poll body nga posibleng mausab kini samtang ginahuman na ang opisyal nga canvassing sa mga boto.
Adunay kinatibuk-ang 69,673,655 ka mga rehistrado nga mga botante alang sa 2025 Elections, diin 1.24 ka milyon ang mga botante sa gawas sa nasud, dugang sa Comelec.
