Nakatala ang Philippine National Police (PNP) og 28 ka kaso sa vote buying sa tibuok Pilipinas hangtod sa adlaw sa piniliay , Mayo 12.
Base sa report sa nasudnong kapolisan, sa 28 ka vote buying incidents, mikabat sa 68 ka mga indibidwal gikan sa nagkadaiyang dapit sa nasud ang giila nga nalambigit.
Sa maong mga kaso, 19 ang nadakpan, samtang 22 ang gipangita karon.
Sa kinatibuk-an, lima ka mga kaso ang wala pa masumiter, usa ang nakapiyansa, walo ang alang sa pagpasaka, walo usab ang na-dismiss, ug unom pa ang padayon pa nga giimbestigahan.
Matod ni PNP Chief, Police General Rommel Francisco D. Marbil, ang gitutokan sa kapulisan sa mga kaso sa vote buying isip tubag sa direktiba ni Presidente Ferdinand R. Marcos Jr. nga sumpuon ang vote buying ug pagseguro sa integridad sa 2025 National and Local Elections.
Daghan sa mga kaso sa vote buying nga natala sa PNP naggikan usab sa mga rehiyonal nga buhatan niini.
Gipasalig ni Gen Marbil nga magpadayon ang kapolisan sa paggukod sa mga nalambigit ug dili mohunong sa pagpanubag kanila, bisan og nahuman na ang pagpili sa mga kandidato.
