Mitala ang Department of the Interior and Local Government (DILG) og 16 ka mga reklamo sa publiko kalabot sa pagpahimulos sa pipila ka kandidato sa paggamit sa mga programa sa Department of Social Welfare and Development (DSWD).
Basi sa datos nga nahipos sa ahensya, daghang insidente sa pagpang-apod-apod sa mga hinabang, partikular sa ilawom sa Ayuda para sa mga Kapos ang Kita Program o AKAP ug bisan sa Assistance to Individuals in Crisis Situation o kon AICS, ang gireklamo sa ilang buhatan.
Ang maong sistema gigamit sa pipila ka mga politiko nga modagan karong eleksiyon aron mamalit og boto gikan sa publiko ug ang pag-apod-apod sa mga hinabang mismo maoy gigamit aron makita nga daw gikan kanila ang hinabang pinansyal nga nadawat sa mga benepisyaryo niini.
Human niini, gipahinumdoman sa DSWD nga hugot nga gidili ang maong mga kalihukan ug pagpahimulos sa mga programa sa ubang ahensya nga exempted sa public spending ban karong piniliay.
Gikompirma usab sa ahensy nga padad-an og show cause order ang 16 ka mga kandidato nga nalambigit sa insidente, nga kon mapamatud-an nga nalambigit mahimong basehan sa mga kandidato nga mag-atubang og disqualification case.
Samtang ang pamunuan sa DILG padayon nga nagmonitor ug aktibong nagtan-aw sa mga reklamo nga ilang madawat sa umaabot nga mga adlaw.
Gipasalig sa DSWD nga dili motugot ang ilang pamunoan sa maong mga kalihukan ug ipahibalo dayon kini sa Commission on Elections (Comelec) aron mahatagan og kasulbaran ang mga nalambigit ug mahatagan og hustisya alang sa limpyo nga piniliay.
